رواية ليتك لا تعرف سرى القسم الاول بقلم اسماء الطبلاوي

فرح: بعيد الشر عنك وبطل عصبيه علشان ما تتعبش اكتر من كده شوف انا مش من نوع الدكاتره اللي بتخبي على المريض تعبه ولا بتزوق الحقيقه انا بحب اجي دوغري حضرتك لما كنت جاي بحالة تسمم المستشفى انا شفتك بالصدفه ويومها لما شفت طريقه تنفسك وانت نايم شكيت في حاجه واستاذنت والدك اعمل لك شويه فحوصات وحصل وطلع شكى في محله انت عندك قصور كلي في عضله القلب وتلف في الصمام الرئيسي بمعنى اخر انت لازم تعمل عمليه زرع قلب في اسرع وقت والا حياتك هتبقى في خطر وقبل بقى ما ترفض وتقول لي انا ما بتعبش وانا قوي واشجع راجل

في العالم او حتى تقول مش مهم خليني امو-ت احب اقول لك ان والدك كان هيجراله حاجه لما عرف واخوك عرض عليا اني اخد قلبه اديهولك ويعيش هو بقلبك حتى لو ايام قليله بس انت تعيش علشان كده قبل ما تقول لا فكر انت مهم عند ناس قد ايه بيحبوك ومسنودين عليك انا كده خلصت كلامي معاك ممكن بقى بعد اذنك تديني مشبكي علشان الم شعري وامشي ولو حصل وحضرتك وافقت انا هديك اهو الكارت بتاعي تقدر تبلغني في اي وقت لو وافقت هات بقى المشبك من فضلك.

(بعد ما سمع جاسر كل كلامها اللي ما قدرش حتى يجاوب على حرف منه اداها المشبك الخاص بيها واول ما جت تخرج ندهلها جاسر: استني عندك يا انسه انتى بعيدا عن انك صدمتيني بفكره اني ممكن ابقى احم زي ما انتى بتقولي عيان وكده يعني بس هو انتى خرجتيهم عشان تقوليلي الكلام ده بس اللي اصلا كان ممكن تقوليه قدامهم نظرا لانهم عارفين فرح: وهو في ايه بينا تاني غير الموضوع ده… انت تخيلت ان انا ممكن اتكلم معاك في ايه ثاني غير كده يعني.

جاسر: انا تخيلت انك ممكن تكوني خرجتيهم عشان تحاسبيني يعني على… فرح: ما حصلش حاجه والموقف اللي حصل ده انا هعتبره ما حصلش بعد اذنك انا ورايا شغل كثير جدا فكر في كلامنا وكلمني عرفني هتتصرف ازاي بعد اذنك وما تقلقش انا مسامحه في حقي يعني مش هدعي عليك بيه. (ما استنتش فرح ان جاسر يرد على كلامها وخرجت على طول علشان تخفي زعلها من الموقف اللي حصل معاها وقعد هو غضبان بيفكر ولما نزلت وقفها صفوت وفادي بسرعه علشان يعتذروا لها عن الموقف اللي حصل.

فادي: انا بجد اسف جدا بالنيابه عن جاسر على اللي عمله معاكي وعلى فكره ده مش طبعه ابدا والله جاسر مستحيل يمد ايده على بنت لكن انا مش عارف ايه اللي حصل صفوت: يا خبر يا بنتي ده انت اتعورتي.. جاسر زودها قوي تعالي اقعدي انظفلك الجرح ده قبل ما تمشي واقبلي مني اعتذاري فرح: انا مش عارفه انتم مكبرين الموضوع كده ليه جاسر انا هعرف اتصرف معاه انما انا ما بحبش اشوف حد متوتر كده بسببي ما تقلقوش انا بخير بعد اذنكم بقى.

الفصل ال4 (بعد ما مشيت فرح من بيت جاسر عدى عليها باقي اليوم بهدوء وفي الوقت ده كان جاسر بيفكر في كلامها لدرجه انه رفض حتى يتكلم مع ابوه او اخوه ولا يعترف بمرضه. جاسر: انا مش عيان ولا حاجه هم بس اللي مكبرين الموضوع انا كويس.. حبايتين مسكن وهبقى حلو جدا مش هسيب كل حاجه تقع على دماغهم هم ولو انا حتى عيان بجد مش هسمح انهم يقعوا بسبب ضعفي ان شاء الله هبقى كويس.

( وتحت كان صفوت وفادي قلقانين وما بطلوش تفكير واعصابهم اتحطمت من القلق وهو رايح جاي قدامهم ما بيتكلمش مع حد فيهم. فادي: وبعدين يا بابا احنا هنسيبه اخذ الموضوع كده عادي بمزاجه مش هنحاول ان احنا نعمل اي حاجه خالص المفروض نتصرف ونجبره يعمل العمليه دي صفوت: يا ابني ما فيش حاجه اسمها نجبروا انه يعمل العمليه لو ما كانش مقتنع يبقى ما لهاش لازمه جاسر مش صغير وانت عارف ان ما فيش حد بيعرف يمشي كلامه عليه.

فادي: يعني هنسيبه يم-وت نفسه بالبطيء ده حتى يبقى ظلم. صفوت: ان شاء الله خير اللي عاوزه ربنا هيكون. ( فرح كل ده كانت حزينه وزعلانه وبتقعد في مكتبها في المستشفى تعيط بسبب الموقف اللي حصل بينها وبين جاسر. فرح: مش عارفه انا عملت له ايه علشان يعمل معايا كده كل ده علشان بواجهه بتعبه ومرضه امال لو ما كانش كل حاجه بالورق وعليها دليل كان عمل ايه بس انا مش هيأس هدور برده على حد يكون عامل وهب اعضاء وهدخل كذا قائمه انتظار هنا وبره علشان اشوفله القلب وان شاء الله انا عندي ايمان ان هو قريب هيوافق

( كانت كل الفتره دي بتعدي على فرح وهي بتدور على القلب المناسب لجاسر ورحمه ما كانتش نزلت على طول علشان كان عندها امتحان واليوم ده بعد ما رجعت فرح من بره تعبانه نامت وما صحتش غير على صوت نوال امها وهي بتصحيها. نوال: فروحه اصحي بقى يا قلبي تاخرتي على شغلك وكمان في حد مستنيك بره بقاله ربع ساعه واكثر قومي بقى. فرح: يا ماما انا ما بنامش بقالي اسبوع سيبيني شويه مين بس اللي مستنيني دلوقتي في ساعه زي دي ده ايه الرخامه دي على الصبح.

رحمه فجاه: انا يا واكله ناسك اجعد ولا ارجع من مطرح ما جيت عشان تعرفى تنامي براحتك فرح: رحمتي كيفك يا غاليه اتوحشتك جوي كل دي غيبه وانا اللي عماله اجول بكره بعده هتيجي وانتى ولا على بالك نوال: يا لهوي نفسي اعرف بتقلبي صعيديه كده فجاه ازاي لما بتشوفيها وكانك متربيه في الصعيد. (بعد اللقاء الجميل ده ما بين رحمه وفرح خرجوا وقعدوا في الصاله يفطروا ويتكلموا ويضحكوا وبعد شويه استاذنت فرح عشان تلبس وتروح شغلها لما دخلت وراها رحمه.

رحمه: يعني الاسبوع الاجازه اللي انا جايه اجعدوا معاكي هتروحي فيه الشغل بردك وتسيبيني امال انا جايه اجعد مع مين فرح: طيب ما تيجي معايا يا دكتوره رحمه هو انت مش تخصص طب يبجى انزلي معايا المستشفى واعتبري حالك في تمرين اهو حتى تكتسبى خبرات رحمه: والله فكره بس انا كنت عاوزه انزل اشتري شويه حاجات الاول جبل ما اجي معاكي ايه رايك ما تاجي معايا وبعدين نروح مع بعض المستشفى. فرح: روحي اشتري الحاجه اللي انتى عاوزاها كيف ما تحبي بس ما تزعليش مني مش هعرف اجي معاكي اصل طلبوني بسرعه في الشغل وما اجدرش اتاخر معلش يا حبيبتي.

رحمه: خلاص يا حبيبتي ما تاخريش روحك سيبيلي عنوان المستشفى وانا هجيب اللي محتاجاه وابعته على اهن واجي لك على طول اتفجنا فرح: اتفجنا.. تمام جوي هستناكى هناك انا هنزل بجى وخدي عنوان المستشفى من ماما عشان متاخره جوي. (راحت فرح المستشفى بسرعه وكانت رحمه حاسه بشويه تعب في معدتها لكن هي من النوع اللي بيتجاهل الالم ده نوال: مالك يا بنتي بطنك بتوجعك ولا ايه يا رحمه رحمه: ولا وجع ولا حاجه ده شويه مغص خفيف ما تجلجيش انا هنزل بجى ومش هغيب

نوال: ماشي يا حبيبتي ما تنسيش تاكلي حاجه لحد ما تيجي مع فرح وتتغدوا رحمه: حاضر بالاذن. (نزلت رحمه واشترت كل اللي نفسها فيه وبعدين بعتته على العنوان بتاع فرح وراحت المستشفى وهي بتعدي الشارع اللي قدام المستشفى ما اخذتش بالها من العربيه اللي جايه ناحيتها بسرعه صرخت فجاه العربيه وقفت قدامها من غير ما تخبطها ونزل منها فادي بوسامته المعتاده علشان يطمن يشوف فيها حاجه ولا لا. فادي: جرى ايه يا انسه مش تاخدي بالك وانتى معديه الشارع كنت هتخليني اخبطك وتجيبيلي داهيه.

رحمه: انا بردو اللي اخذ بالي يا جدع انت ولا انت اللي تفتح وانت ماشي لما انت ما بتعرفش تسوج بتتهب تركبها ليه ايه فاكرين نفسكم راكبين طيارات ده اسفلت يعني في بني ادمين رايحين جايين. فادي: الله الله شوف مين اللي بيتكلم بقى انا ما بعرفش اسوق يا جاهله ده انتى لسانك اطول منك صحيح يعني غلطانه وبتبجحي. رحمه: انا جاهله يا كركوب يا معيوب…. يا صرصار نايم بالمجلوب… يا حمار بيتحدف بالطوب… يا بهيم انت.. ما تفوج لحالك يا اخ.

فادي: ايه ده كله… ايه ده كله.. انتى بتقولي ايه انا مش فاهم اي حاجه.. بت انتى اوعي تكوني بتشتميني ومستغله اني مش فاهم اللغه رحمه: لا والله نبيه ما انا اكيد بشتمك مش بتجول عليا جاهله بجولك ايه يا اخينا وسع من جدامي احسن انا تعبانه ومش جادره اجف على رجلي وانت عمال تتحنجل جدامي كيف فرجع لوز فادي: استني بس تعبانه من ايه هي العربيه خبطتك بجد ولا انتى تعبانه من حاجه ثانيه

رحمه: يا سيدي لا ما خبطتنيش وسع بجى من جدامي مش جادره ده ايه المصايب اللي على الصبح دي فادي: طب استني بس انا هوصلك فوق شكلك فعلا تعبانه جدا وبعدين لمى لسانك شويه انا ما غلطتش رحمه: انا اللي غلطانه يا سيدي ارتحت اكده…وبعدين انا بعرف اوصل نفسي بنفسي ريح حالك انت. (سابت رحمه فادي ودخلت المستشفى وهو وراها ركبت الاسانسير ركب في نفس الاسانسير معاها كانت بتبص له بغضب وهو مش مرتاح لملامحها التعبانه واول ما جه يبص عليها لقاها بتمسك في جدار الاسانسير علشان ما تقعش حاول يسندها.

رحمه: لا ما تلمسنيش يا جدع انت ابعد عني فادي: هو التعب في عند كمان يا انسه انا هسندك لحد ما نطلع على اوضه الكشف فوق بس على فكره انا انسان محترم جدا يعني ( ما جاوبتوش رحمه على كلامه لانها اغمى عليها وكانت حرارتها عاليه جدا شالها فادي وطلع بيها فادي: يا نهار اسود على الصبح دي ماتت دي ولا ايه اياك ما تكونش ماتت وتوديني في داهيه طلعتلي منين دي بس. (شال فادي رحمه وخرج يجري ينادي على دكتور شافته فرح جت جري عليه

فرح بخوف: ايه ده رحمه ردى عليا ايه اللي حصل يا فادي شفتها فين ولا ايه اللي حصلها جرالها ايه دي فادي: انتى تعرفيها.. طب دخليها اول نشوف مالها وبعدين ابقى احكيلك كل حاجه يا ستى. ( اتوجهت فرح مع فادي ورحمه لغرفه الفحص وبعد ما كشفت عليها لقت ان عندها تلبك معوي شديد اطمنت عليها واخذت فادي وخرجت عشان تفهم منه ازاي اتقابلوا. فرح: ايه اللي حصل مع رحمه يا فادي وجرالها ايه بالظبط انا سيباها كويسه في البيت

فادي: دي رحمه دي… دي ظلم افترى… انا كنت جايلك هنا لقيتها بتعدي الشارع ومش بصه قدامها كنت هخبطها بالعربيه لولا ستر ربنا اني فرملت فجاه وما خبطتهاش نزلت اطمن لا تكون حصل لها حاجه راحت مسكاني بقى ونزلت تلبيخ وشتيمه وحياتك ما فهمت منها ولا كلمه واحده… وبعدين طلعنا في الاسانسير لقيتها هتقع من التعب سندتها وجبتها هنا على طول هو ده اللي حصل لحد ما انا واقف قدامك. فرح: ثواني بس هو انت بتقول كنت جاي على هنا ليه حصل حاجه مع جاسر

فادي: انا اللي المفروض اسالك جاسر حصل معاه حاجه ولا لا فرح بتعجب: ازاي يعني مش فاهمه وانا هعرف منين فادي: اصل جاسر صحى الصبح نزل بابا بيساله رايح فين قال له انه جاي المستشفى الاول وبعدين هيروح الشركه ها قوليلي بقى هو كان جايلك هنا ليه وما تخبيش عليا. فرح: انت قصدك ان جاسر موجود هنا في المستشفى ما شفتوش لسه فادي: بتهزري ازاي ما شفتيهوش

فرح: والله ما شفته لسه.. بص انا هروح اشوف لو حد سال عليا ولا لا وهشوفه فين وانت خليك هنا لحد ما رحمه تصحى ما تسيبهاش لوحدها من فضلك دي ما تعرفش حد هنا غيري فادي: استني بس يا فرح انتى هتسيبيني مع دي لوحدي… استني بقولك. (ما جاوبتوش فرح وسابته وطلعت تجري على الاستعلام تشوف حد سال عليها ولا لا والموظفه قالت ان في حد مستنيها في مكتبها. فرح يا رب يكون هو خلينا نبدا بقى رحله العلاج من دلوقتي بدل ما يحصل مضاعفات انا مش عارفه هو متخن دماغه ليه.

( وصلت فرح مكتبها لقت جاسر قاعد ماسك صدره وسامح قاعد معاه وهريه اسئله قعدت على اقرب كرسي جنب جاسر اللي كان وشه دبلان. فرح: اهلا وسهلا يا استاذ جاسر ما كنتش اعرف انك هتنورنا بسرعه كده اتمنى ما يكونش حد ضايقك خلال انتظارك ليا تشرب حاجه. جاسر: لا ابدا الدكتور سامح عمل الواجب وزياده.. مش شايفه ما فيش اي حاجه ضايقتني خالص المهم انا عايزك في كلمتين بعد اذنك يا دكتوره على انفراد

سامح: وانفراد ليه ما تقول انت عايز ايه قدامي هو انت عايزها في موضوع شخصي يعني هنا في المستشفى اكيد يعني هيبقى عشان حالتك الطبيه وانا كمان دكتور ممكن افيدك ( اتخنقت فرح من تدخل سامح الزياده في حياتها وما قدرتش تسكت اكتر من كده فرح: لو سمحت يا دكتور سامح سيبنا لوحدنا شويه وروح شوف المرضى اللي المفروض تمر عليهم وبعد اذنك بلاش تتدخل في حياتي الشخصيه وقلتلك الكلام ده قبل كده مليون مره انت تعرف منين هو جايلى فى موضوع شخصي ولا موضوع طبي

جاسر: بالراحه يا جماعه الموضوع مش مستاهل بس انا عاوز اكلم الدكتوره في حاجه شخصيه شويه يا دكتور سامح سامح: كده يا فرح بقى بتخرجينى انا وبتقوليلي ما ادخلش في حياتك اشحال يعني ما كنا زملاء من ايام الجامعه فرح: اسمي دكتوره فرح لو سمحت احنا في مكان شغل وبعدين الزماله نفسها ما تدلكش الحق انك تدخل في حياتي سامح: تمام انا كده فهمت عن اذنكم