*** السبت.. ٥ مايو ٢٠١٨م حامِل!
من مين؟
مني؟ ولا منه؟ *** الجُمعة.. ٧ ديسمبر ٢٠١٨م مش شبهي!
مريم مش شبهي!
مشفتش عبد الرحمن قبل كدا عشان أحكم هي شبهه ولا لأ! بس عارف شكلي وملامحي كويس عشان أعرف إنها مش شبهي!
ماما بتقول البيبي دايماً شكله بيتغير! بس لأ.. دي واضح إنها مش شبهي أبداً ..!
اضطريت ابتسم من غير نفس.. وغالباً كلهم مخدوش بالهم! *** الإثنين ٥ أغسطس ٢٠١٩م مش طايقها!
مش عارف أعيش معاها!
مش قادر أبص في وش مريم!
مش قادر..!
*** السبت.. ٦ يونيو ٢٠٢٠م هي ليه قالت للبوليس أنها وقعت من البلكونة؟
ليه مقالتش أن أنا اللي عملت فيهم كدا؟ فرصة ذهبية عشان تخلص مني!
بس أكيد هي بتخطط لحاجة تانية..
ما أنا لو دخلت السجن مش هطلقها..! بس لأ..
هي أكيد عايزة تخلص مني عشان يخلى لها الجو مع حبيب القلب!
أكيد بتخطط تخلص مني!
لازم أخلص منها قبل ما تخلص مني!
لازم! *** الجمعة.. ١٩ يونيو ٢٠٢٠م بيقولوا ساعة الغضب الحقيقة بتبان!
اتخانقنا وقلت كل حاجة! طلعت كل اللي جوايا!
النهاردة.. الورق كله اتكشف!
*** السبت.. ٢٠ يونيو ٢٠٢٠م زي ما المثل بيقول: لازم أتغدى بيها قبل ما تتعشى بيا..! *** الأحد.. ٢١ يونيو.. ٢٠٢٠م كلمت صيدلي صاحبي النهاردة وقالي على اسم أدوية معينة لو خدتهم هيعملوا زي سكتة قلبية..
والوفاة هتبان طبيعية!
حلو دا..! *** الثلاثاء ٢٣ يونيو ٢٠٢٠م على حسب اللي قاله ليا الصيدلي..
هرجع من الشغل ألاقيها ميتة في البيت!
بس دلوقتي.. لازم أروح الشغل عشان إتأخرت. ______________^^
____________^^
دا كان آخر حاجة مكتوبة في الدفتر التاني..
لا ثواني.. لأ.. ثواني كدا..
يعني هو كان عارف كل حاجة!
أو على الأقل قرأ أول حاجة كتبتها بس!
وعاش حياته كلها شاكك فيها إنها خاينة!
وفي الآخر خطط لق**ها في نفس اليوم اللي هي خططت فيه لق*له!
هو إداها دوا يعمل لها سكتة قلبية وهي قطعت له سير الفرامل!
والاتنين المفروض ماتوا في نفس اليوم!
طيب مين دول؟
أنا قابلت مين لما جيت هنا؟
هو دا مقلب؟!
📱 مكانش أدامي غير حل واحد..
أدور بنفسي طلعت موبايلي وبدأت أدور.. ولقيت ٣ أخبار مهمين عن الموضوع بتواريخ قديمة ومع كل خبر كنت بقراه.. قلبي كان بيقف من كتر الخوف..! *** الخبر الأول كان بتاريخ السبت ٦ يونيو ٢٠٢٠م وفاة ابنة رجل الأعمال الشهير جمال رأفت الدمنهوري بعد سقوطها هي ووالدتها من الطابق الثاني، بينما كانت والدتها في حالة صحية حرجة، شك النقيب محمد أنور في الأمر وبسؤال الأم أصرت على أن الابنة سقطت معها من الشرفة أثناء تواجدهما فيها دون أي تدخل خارجي.
*** الخبر التاني بتاريخ الثلاثاء ٢٣ يونيو ٢٠٢٠م حادث أليم على الطريق الدائري نتج عنه ١٢ حالة وفاة و١٠ مصابين، أشهرهم رجل الأعمال الشهير جمال الدمنهوري الذي فقد السيطرة على سيارته مما تسبب في الحادث ومن المعاينة المبدئية للحادث.. فالأمر بالكامل كان قضاء وقدر دون أي شبهات جنائية. *** الخبر الثالث بتاريخ الأربعاء ٢٤ يونيو ٢٠٢٠م
وفاة السيدة شاهيناز العتباني زوجة الراحل جمال الدمنهوري حزناً على وفاة زوجها وأبت السيدة شاهيناز إلا وأن يتوقف قلبها حزناً وكمداً على شريك حياتها الراحل، لتكتمل مأساة هذه الأسرة التي بدأت بوفاة الإبنة سقوطاً من الطابق الثاني، ثم وفاة الأب في حادث أليم، قبل أن يتوقف قلب الأم حزناً وكمدًا على فراقهما.. _________________^^
_____________^^ ساعتها بدأت أجمع الخيوط، مريم ماتت في الحادثة ودا اللي دفع شاهي إنها تنتقم من جمال، لكن جمال كان شاكك في خطتها، عشان كدا هو كمان كان بيحط خطة يخلص منها فيها، وفي الآخر.. لسخرية القدر.. الإتنين خلصوا من بعض في نفس اليوم!
سابوا الدنيا سوا..!
بس لحظة.. لحظة!
أمال مين اللي نايمة فوق؟
ومين اللي فتحولي الباب؟ 🧟♀️🧟♂️ سمعت صوت من ورايا!
بصيت ورايا وشفتهم!
واقفين لابسين أسود في أسود!
مريم مليانة كدمات وكسور بشكل بشع،
جمال جسمه معجون في بعضه كأنه لسه طالع من حادثة العربية حالاً وشاهي وشها أسود ومليان ألم، كل اللي كانوا بيقولوه هو : 💀 تعالي معانا.. إنتي كشفتي السر..
تعالي معانا.. إنتِ كشفتي السر ☠️
حاولت أهرب بس كانوا أقوى مني وأسرع مني!
جريت منهم.. بس حاصروني في ممر ضيق ومع كل خطوة كانوا بيقربوها مني كانت لمبات البيت بتفرقع واحدة ورا التانية، لحد ما الظلام ساد البيت كله ..! وآخر حاجة فكرت فيها كانت :
أد إيه الفضول ساعات بيكون مؤذي ..!! تمت،،