عزة…..صباح النور يا حبيبتى عاملة ايه يا سچى
سچى….الحمد لله يا طنط عزة عن اذنكم علشان ورايا محاضرة كمان شوية
نعمة…..مع السلامة يا حبيبتى
سچى….الله يسلمكم
بعد ذهاب سچى نظرت عزة تجاه نعمة ولكنها لاحظت انها ليست على طبيعتها
عزة…..مالك يا نعمة لسه برضو معدتك وجعاكى
نعمة…..مش عارفة فى ايه يا عزة معقول يكون دور برد تقيل شوية
عزة……تعالى نروح لدكتور اكشفى وشوفى هيقولك ايه اهو تطمنى على نفسك برضو يا حبيبتى
نعمة…..ان شاء الله يلا بينا دلوقتى نلحق الشغل
****************************
فى الجامعة
ذهبت سچى الى كليتها وقابلت ايضا صديقتها
ريهام فهى كانت تنتظرها وعندما رأتها ابتسمت لها
ريهام……ايه يا بنتى بقالى شوية مستنياكى
سچى….انا جيت اهو ثم لسه فى وقت على المحاضرة
ريهام….ما انا عارفة انا بس زهقت من القعدة لوحدى
لمحت سچى فتاة تنادى عليها ولم تكن سوى اختها من ابيها وتدعى أروى
أروى بابتسامة…….سچى عاملة ايه وحشتينى
سچى…..وانتى كمان انتى جاية ليا مخصوص
أروى……قولت اجى اشوفك قبل ما اروح احضر المحاضرة بتاعتى
سچى….وعاملة ايه فى كليتك
اروى….اهو لسه فى اول سنة وبخبط ههههههه
ريهام……انتى فى كلية إيه
اروى…..تربية فرنساوى
ريهام بضحك…..دى سهلة يا ستى يعنى مش
صعبة
سچى….المهم ركزى فى مذاكرتك
أروى…..حاضر طب انتى فاضية النهاردة اقعد معاكى شوية
سچى….على الساعة ١٢ الضهر هكون فاضية انتى وراكى محاضرات
أروى….لاء تمام هبقى اجيلك باى دلوقتى
سچى بابتسامة…..مع السلامة
بعد انصراف أروى استغربت ريهام من قوة العلاقة بين سچى وأروى فهى تعلم انهم اخوات من أب واحد ولكنها تعلم ان والدة أروى امرأة قوية وقاسية فكيف تنجب فتاة رقيقة مثل أروى
ريهام……غريبة اوى
سچى باستغراب……هى ايه دى
ريهام…..علاقتك باختك
سچى….
غريبة ان اكون انا واختى بنحب بعض
ريهام……انتوا يعنى من اب واحد بس اللى عرفتو منك ان امها ست مش سهلة ومفترية
سچى….بس أروى مش كده وانتى شوفتيها
ريهام…..اه لطيفة اوى ورقيقة
سچى…..هى فى الاول والاخر اختى بصرف النظر عن اى اعتبار تانى وانا بحبها جدا بالرغم ان احنا بنتقابل صدفة لان مامتها مبترضاش تخليها تيجى عندنا ولا بتحبنى اروح عندهم
ريهام…..شكل مرات ابوكى عاملة زى مارى منيب لما كانت بتقول طوبة على طوبة خلى العركة منصوبة هههههه
سچى…..يلا يابت مش وقت خفة دمك دلوقتى يلا بينا على المحاضرة
*******************************
فى منزل حامد
راضى
كانت تلك المرأة تقف امام المرآة تطمئن انها مازالت جميلة مثل ما كانت عليه فجمالها هو من اغرى ذلك الرجل وترك زوجته الاولى وابنته من اجلها فهى تعرف كيف تجعله تحت سيطرتها ولا يرفض لها اى طلب كان
حامد…..ايه يا فادية فين الفطار
فادية…..الفطار جاهز على السفرة برا انت مشفتوش
حامد…..هو اللى يشوف الجمال ده يشوف حاجة تانية
فادية……ما انت مستخسر فى الجمال ده ١٠ الاف جنية
حامد….بس انا محتاج الفلوس دى علشان اجيب خشب للورشة
فادية بزعل مصطنع…..خلاص مش عايزة منك حاجة ما هو انا كده لما اطلب منك حاجة لازم تتحجج
حامد…..مش حجة بس محتاج الفلوس فى شغل
فادية…..خلاص بقى مش عايزة منك حاجة
حامد…..اوعدك اخلص الطلبية وهشتريلك الدهب اللى انتى عوزاه
فادية…..انت اللى قولت اهو ومترجعش فى كلامك
حامد…..وانا امتى رجعت فى كلامى كل طلباتك اوامر
فادية….تسلملى يا ابو بنتى
حامد…..هى فين أروى صحيح
فادية……راحت الكلية من بدرى بتقول وراها محاضرات كتير النهاردة
حامد…..كنت عايز اروح اشوف نعمة وسچى النهاردة واخدها معايا
عندما سمعت فادية ذلك شعرت بغضب شديد فهى لا تريده ان يذهب الى زوجته الاولى وابنته
فادية…..هو انت رايح جاى على بيت نعمة
حامد…..
حرام عليكى هو انا بروح هناك الا قليل
فادية…….انا مش عيزاك تروحلها مش كفاية بنتى اتعلقت ببنتك
حامد…..هى تبقى اختها فى الاول والآخر
فادية…..ايه حنيت لنعمة ولا ايه مبقتش عجباك دلوقتى
حامد…..انا قولت كده هى برضو مراتى ولازم اطمن عليها هى وبنتى
فادية…..كفاية انى راضية انها تبقى على ذمتك اكتر من كده لاء
حاولت استخدام دلعها وزعلها المزيف فهى تعرف تأثيرها عليه فهو لا يستطيع ان يتحمل ان تبتعد عنه
فادية بدموع زائفة…..خلاص لو مش عاوزنى سيبنى ورحلها هى ما انت مبقتش تحبنى خلاص راحت عليا اهئ اهئ اهئ
حامد…..اهدى يا حبيتى انا
اقدر ابعد عنك برضو
فادية…..ما انت خلاص قدرت واللى كان كان
حامد……هى برضو ليها حق عليا
فادية…..حق مين يا ابو حق ما كل مرة تروح مبترضاش تاخد منك حاجة وتعمل فيها الست اللى نفسها عزيزة ومبتقبلش حاجة من حد ريح نفسك كل مرة تروح وترجع قفاك يقمر عيش منها ومن كلامها
تذكر حامد معاملة نعمة له عندما يذهب اليهم ولكنه هو السبب الرئيسي فى حالتها تلك فهو تركها وتزوج عليها ولا يسأل عليها هى او ابنتها الا نادرا فهو مشغول بحياته مع تلك المرأة التى استطاعت اخذه من زوجته الأولى وتزوجته
حامد…..بس سچى بنتى وبرضو ليها
حق
فادية من غير نفس…..اااه ست الدكتورة اللى حاطة مناخيرها فى السما
حامد….سچى مش كده دى طول عمرها مؤدبة ومتواضعة بدليل أن أروى بتحبها اوى
فادية…..اه ما انت لازم تقول كده اصلك مخلفتش غير ست الدكتورة وانا وبنتك مش قد المقام
حامد….ازاى تقولى كده بس ما انا عايش معاكم وسايبهم
فادية بدلع….طب يا حامد يلا علشان تفطر وتنزل تفتح ورشتك وتشوف شغلك علشان اشوف هتجبلى ايه بقى المرة دى
حامد….كل اللى انتى عوزاه يجيلك لحد عندك يا قمر
فادية…..تسلملى يا جوزى يا حبيبى
فكانت هذه حالتهم دائما تستطيع ان تؤثر عليه وتنسيه ان
زوجته الاولى وابنته لهم مثل الحقوق عليه ولكنه منغمس فى حياته مع تلك المرأة التى لو كان بيدها كان اخفت نعمة وسچى من الوجود
********************************
فى منزل ماهر زيدان
منزل جميل يسكنه الأب والام والجدة وثلاثة ابناء ذكور كانت هدى الأم تعشق اولادها الثلاثة وزوجها فهى تزوجته بعد قصة حب جميلة وتوجت قصة الحب بانجاب ثلاثة ابناء وكلما كبر ابنائهم كبر معهم حبهم فوالدهم لايتخيل يوم لايرى فيه وجه زوجته الجميلة
هدى بابتسامة…… صباح الخير يا حبيبى
ماهر….صباح الجمال والحلاوة
وبالرغم انهم متزوجون من ٣٥ عام الا انهم مازال الحب بينهم مثلما كانوا صغار
هدى….يلا علشان تلحق تفطر وتروح شغلك
ماهر…..حاضر
هدى….انا حضرتلك الهدوم وهنزل اشوف الفطار والاولاد
ماهر بحب….تسلملى ايدك الحلوة دى
هدى…..تسلملى يا حبيبى
خرجت هدى من غرفتها سمعت صوت حركة فى غرفة ابنها الاكبر فتحت الباب بابتسامة وعندما رأى والدته ابتسم لها واخذ يدها يق.بلها بحب
رائف….. صباح الخير يا دودو
هدى…. صباح النور يا قلب دودو
رائف بمزاح…بابا صحى ولا نموسيته كحلى
هدى….
بطل شقاوة يا ولد
رائف…..ولد كل الطول والعرض ده ولد اه لو سمعك العساكر فى الكتيبة بتاعتى يقولوا عليا ايه
هدى….هههه انا أمك اقول اى حاجة براحتى انت جهزت شنطتك
رائف…..اه خلاص هتوحشينى الشوية دول يا دودو
هدى….تروح وتيجى بالسلامة يا حبيب أمك
انتهى من ارتداء ملابس الجيش فهو ضابط صاعقة فى الجيش وله من العمر٣٤ عاما وانتهت اجازته وسيعود الى عمله مرة اخرى
وجدت هدى حماتها وابنها الثانى ينتظرون على السفرة
هدى….صباح الخير
صفية….صباح الخير يا حبيبتى ماهر صحى
هدى….ايوة ونازل دلوقتى هو ورائف بتعمل ايه يا أكرم
أكرم…..بنقنق على
ما تيجوا يلا ورايا عمليات كتير النهاردة
كان أكرم الابن الثانى دكتور وله من العمر ٣٠ عاماً يعمل بالمستشفى الخاص بهم
هدى باستغراب……شادى فين
ولكنهم سمعوا صوت فرقعة قوية تأتى من الجنينة فعلمت اين يكون شادى الآن فهو فى المعمل الخاص به
أكرم……عرفتى المتخلف ده فين فى المعمل كويس ان بابا عامله المعمل فى الجنينة والا كان زمانه هد البيت على دماغنا بتجاربه المتخلفة دى
دخل الابن الثالث ويدعى شادى شاب فى ٢٠ من عمره بالسنة الثالثة بكليه العلوم قسم كيمياء فهو يحب دراسته جدا ويرى نفسه عالم فى المستقبل
أكرم…..اهلا يا زويل فرقعت ايه
المرة دى
شادى…..مش عارف يا جدع ايه اللى بيحصل مع ان كل العناصر بالكمية المظبوطة
هدى…..طب روح اغسل وشك يلا علشان تروح كليتك
شادى…..صباح الخيرات على جميلة الجميلات
هدى….بطل بكش يا واد انت
شادى….صباح الخير يا صفصف
صفية….
صباح النور يا حبيب صفصف
على السفرة
اجتمع جميع افراد الاسرة لتناول طعام الإفطار قبل ذهاب كلا منهم الى عمله
شادى….الحمد لله يلا مين اللى عليه الدور فى البو.سة النهاردة
وضع جميع افراد الاسرة ايديهم على وجوههم فهم يعلمون ماذا سيفعل شادى سيقوم بتقبيل احد منهم وليس هذا فقط بل انه سيقوم بعض من يق.بله
ماهر…..مش انا اللى عليا الدور
شادى….اللى عليه الدور أبيه رائف
رائف…..واد انت لو جيت جمبى هحط وشك فى طبق المربى انت عارف انا راجع الكتيبة ارجع وانا معضوض شكلى ايه قدام العساكر هناك ولا زمايلى ها
شادى….طب هب.وس
من غير عض
رائف……مستحيل انت فاهم
شادى….خلاص انت يا ابيه أكرم
أكرم…..ما تحترم نفسك ياض انت انت مش عاتق حد انت معلم علينا كلنا
شادى بتمثيل…..كده كلكم بتكرهونى انا عارف ان انتوا لقتونى قدام باب البيت وربتونى شكرا ليكم على كرمكم انا هروح ادور على اهلى
هدى…..ايه مواهب التمثيل الفاشلة دى يا شادى
شادى….بجد ياماما تمثيلى وحش اوى
رائف…..فوق ما تتصور يا شادى يا حبيبى بس احنا مكناش لقينك قدام البيت لاء لقيناك على باب المعبد اليهودى
أكرم…..لاء يا رائف مكنش المعبد اليهودى دا فى صندوق الزبالة اللى على اول الشارع
شادى…..شايف
يابابا ولادك بيقولوا عليا ايه
ماهر…..مش انت اللى جبت لنفسك الكلام
صفية……طب دا انت يا واد يا شادى الوحيد اللى اتولدت فى البيت امك ملحقتش تروح المستشفى
هدى….اه والله ولادته كانت سهلة
شادى…..شوفتوا بقى طول عمرى مش متعب ازاى طول عمرى نسمة كده ماشية فى البيت
رائف…..نسمة!
دا انت زوبعة البيت يا شادى
ماهر….انا سمعت صوت فرقعة من شوية عملت ايه يا شادى
شادى….ولا حاجة يا بابا دى فرقعة الصباح بتاعة كل يوم
رائف….انت بتخترع بومب ولا ايه يا شادى
أكرم…..لاء دى شكلها متفجرات
شادى….اتريقوا اتريقوا بكرة تتفشخروا ان اخوكم عالم الكيميا الكبير شادى زيدان
هدى…..احلى عالم فى الدنيا
شادى….تسلميلى يا ماما يا رافعة من معنوياتى مش زى ولادك المحبطين دول
رائف……يلا بقى علشان انا همشى دلوقتى
ماهر….مش لسه بدرى
رائف…..هعدى على مايا اشوفها قبل ما امشى
عندما سمعت والدته ذلك تغيرت ملامح وجهها فهى لاتحب خطيبته
المدعوة مايا او بالاصح لا يحبها احد من افراد الاسرة فهى فتاة مدللة تعيش بقيم واخلاق لا تتناسب معهم ولا يعرفون سر تمسك رائف بها فهو يستحق فتاة افضل منها
شادى…..استنى يا ابيه خدنى معاك وصلنى الكلية علشان عربيتى بتتصلح
أكرم…. انت خربت العربية تانى
ماهر…..صحيح انا مش عارف اعمل ايه كل شوية تخرب عربيتك انت احسنلك تروح الكلية وانت ماشى على رجلك
شادى….يعنى انت يابابا عندك شركة ومصنع قطع غيار عربيات وعايزنى اروح الكلية وانى ماشى على رجلى
ماهر….ما انا زهقت منك يا شادى ومن عمايلك
شادى….
حبيبى يا بوب كده تزهق من حبيبك واخر عنقودك
ماهر….هههه يلا يا واد انت على كليتك
رائف….يلا يا اخرة صبرى خلينا نمشى اصلك طالعلى فى البخت يا شادى
شادى….اكيد بختك الحلو طبعا
هدى…..تروح وترجع بالسلامة يا حبيبى
رائف….الله يسلمك يا أمى سلام
قام بتوديعهم وانصرف لرؤية خطيبته قبل ان يعود الى عمله ويقوم بإيصال اخيه الى الكلية
ركب سيارته متوجه الى الجامعة ثم سيقصد منزل خطيبته
رائف….يلا يا ابنى انزل