رواية لا أحد سواك رائفي القسم الثاني بقلم سماح نجيب

حامد….طالب ايد سچى بنتى
فادية بدهشة….انت بتقول ايه يا راجل انت
حامد….زى ما بقولك كده وكمان عارض عليا يدينى الفلوس اللى عايزها علشان الورشة
فادية….هو قالك كده يعنى
حامد…..

ايوة وبيقولى الفلوس اللي انت عايزها انا رقبتى سدادة
فادية…..طب كويس يا حامد
حامد…..هو ايه ده اللى كويس يا ولية
فادية….يعنى الراجل شاريك انت وبنتك عايز ايه تانى
حامد…..انتى عيزانى اوافق يا فادية على جواز سچى من المعلم صبحى
فادية….ومتوافقش ليه يعنى دى فرصة متتعوضش
حامد….دا راجل كبير عن بنتى وعنده عيال فى سنها ويمكن اكبر منها كمان
فادية….وفيها ايه يعنى الراجل ميعبوش غير جيبه يا حامد وهو شكله شاريها
حاولت فادية اقناع حامد بالموافقة على طلب صبحى وظلت تقنعه بالموافقة حتى وافق فعلا على زواج سچى من المعلم صبحى واخذ قراره بالذهاب

الى سچى واخبارها بما حدث ولمعرفة رأيها بخصوص هذا الموضوع
******
فى منزل ماهر زيدان
كانوا جالسين في الجنينة عندما حضرت الخادمة لاخبارهم بأن والد سچى يريد مقابلتها
ام سيد……ماهر بيه فى واحد برا بيقول انه ابو الانسة سچى
ماهر….خليه يتفضل
دخل حامد وجدهم جميعا مجتمعين وسچى ايضا تجلس معهم ففكرت سچى فى سر زيارة والدها لها فهى منذ ان انتقلت للعيش هنا وهو لم يزرها مرة واحدة او فكر ان يسأل عنها
حامد…..سلام عليكم
جميعهم…..وعليكم السلام ورحمه الله وبركاته
حامد….انا اسف ان جيت فى وقت مش مناسب
ماهر….لا ابدا متقولش

كده انت تنور فى اى وقت يا ابو سچى اتفضل
حامد….تشكر يا ماهر بيه
صفية….اتفضل يا ابو سچى اقعد واقف ليه
حامد….تسلمى يا ست صفية انا بس كنت عايز سچى فى كلمتين على انفراد ضرورى
صفية….اه طبعا اتفضل خديه يا سچى على جوا علشان تتكلموا براحتكم
سچى….اتفضل معايا يا بابا
دخلت سچى وحامد الى الاستراحة فظل يجيل نظره فى المكان فالمكان فخم جدا
حامد….انتى عاملة ايه يا سچى دلوقتى
سچى ببرود… الحمد لله تمام نحمد ربنا على كل حال
حامد….وهم عاملين ايه معاكى بيعاملوكى كويس ولا تعبينك
سچى….

بقوا اهلى واكتر كمان ومشفتش حد فى حنيتهم عليا واهتمامهم ورعايتهم ليا بعد م*وت امى الله يرحمها
حامد….انتى مرتاحة فى القعدة هنا يعنى
سچى….ايوة بس حضرتك بتسأل الأسئلة دى كلها ليه دلوقتى فى ايه
حامد….بطمن عليكى بلاش يعنى اطمن على بنتى
سچى….غريبة انك جاى تطمن عليا بعد العمر ده كله بس ما علينا حضرتك كنت عايزنى فى ايه
حامد بتوتر….كنت عايزك فى موضوع يخصك
سچى….موضوع ايه ده اللى يخصني اتفضل قول
حامد….

الصراحة هو فى عريس طالب ايدك
سچى بانفعال….ومين قالك انى عايزة اتجوز دلوقتى انا مخلصتش دراسة ثم مش اى عريس هيتقدملى هوافق على طول لازم اكون مرتاحة للموضوع علشان اوافق غير كده لاء
حامد…..هو عريس مقتدر ومبسوط وهيعيشك عيشة حلوة اوى يا سچى
سچى….وهو مين العريس ده بقى ان شاء الله
حامد….المعلم صبحى
سچى بصدمة…..المعلم صبحى ! اللى هو ورشته جمب ورشتك ده
حامد….

ايوة هو ده يا سچى
سچى بتوهان….حضرتك عارف بتقول ايه وبتطلب منى ايه
حامد….سچى صدقينى الجوازة دى لازم تتم ضرورى
سچى….ليه بقى ان شاء الله لازم تتم ضرورى هتستفاد ايه من وراها
حامد….انا محتاج فلوس وهو هيدفعلى الفلوس مقابل الجواز منك
سچى بذهول….حضرتك مستوعب انت بتقول ايه عايز تجوزنى راجل فى سنك وكمان هتجوزنى مقابل انك تأخد فلوس منه يعنى عايز تبعنى قصاد مصلحتك
حامد….انتى بنتى ولازم تقفى جمبى وتسمعى كلامى
سچى….اقف جمبك واسمع كلامك وده من امتى انت طول عمرك رامينى انا وامى ومبتسألش فينا وسبتنا فى الدنيا دى لوحدينا دلوقتى افتكرت انى

بنتك وعايزنى اقف جمبك
حامد….احنا مش هنتكلم فى اللى فات يا سچى احنا فى دلوقتى
سچى….وانا حضرتك مش موافقة انا مش هضحى بنفسى علشان حد هو اصلا مفتكرنيش الا علشان مصلحته وبس
حامد….بس لازم تتجوزيه يا سچى يعنى ترضى ابوكى ينخرب بيته والراجل شاريكى ومستعد لكل طلباتك
سچى….علشان بيتك ما يخربش تضحى بيا وبمستقبلى وبحياتى وعايز تدينى لراجل فى سن ابويا وكمان كل شوية يتجوز ويطلق
حامد….انا قولتلك الراجل شاريكى وهو مش هيمنعك من التعليم وهيعيشك احسن عيشة وانا هسيبك تفكرى بس لازم توافقى يا سچى
ألقى حامد كلامه وتركها وذهب بعد ان هدم كل

احلامها بكلامه فهو لا يخيرها بالزواج ولكنه يجبرها فماذا تفعل فى هذه المصيبة فهى كانت اخذت قرارها ان لم يكن رائف من نصيبها فهى لن تتزوج ابدا فظلت تبكى بشدة حتى صار صوت بكاءها مسموعا
استبد بهم القلق على سچى وخصوصا ان والدها خرج سريعا بعد ان القى عليهم التحية وانصرف سريعا رافضا الجلوس معهم فارادوا معرفة سبب عدم خروج سچى اليهم مرة ثانية فذهبت صفية وهدى وماهر للاطمئنان عليها لان من غير المسموح لأولادهم الدخول الى الاستراحة طالما سچى موجودة فيها
صفية بقلق….مالك يا سچى بتعيطى ليه
سچى بدموع….بابا عايز يجوزنى يا تيتة
ماهر….وده يخليكى تعيطى

يا بنتى كل بنت مسيرها تتجوز ودى حاجة طبيعية
سچى….حضرتك دا عايز يجوزنى لراجل كبير فى السن وكمان متجوز ومخلف يمكن ولاده اكبر منى
هدى….يا خبر ابيض ازاى باباكى يفكر فى حاجة زى دى وازاى يوافق على حاجة زى دى اصلا
ماهر….طب ليه باباكى عايز يجوزك الراجل ده يا سچى
سچى….انا كل اللى فهمته منه ان جوازى قصاد ان الراجل ده يساعده بفلوس هو محتاجها وانا مش عارفة اعمل ايه وانا مستحيل اتجوز الراجل ده او اوافق على حاجة زى كده
صفية….اهدى يا حبيبتى ومتعيطيش ومفيش حاجة هتحصل غصب عنك
سچى ببكاء شديد….انا مش عارفة

اعمل ايه وشكل بابا مصمم على الجوازة دى
هدى…..محدش يقدر يغصبك على حاجة قومى اغسلى وشك وان شاء الله مفيش حاجة هتحصل ضد رغبتك
ماهر….ايوة اطمنى يا سچى احنا مش هنخلى حاجة زى دى تحصل وتضايقى
ذهبت سچى الى الحمام لغسل وجهها من اثر البكاء ففكروا كيف يخرجوا سچى من هذا المأزق
ماهر….احنا لازم نشوف حل فى الموضوع ده
هدى….هنعمل ايه دلوقتى يا ماهر البنت حالتها صعبة اوى
صفية بهدوء….يبقى احنا اللى نجوز سچى قبل ما ابوها هو اللى يجوزها الراجل ده
ماهر….نجوزها ازاى يعنى
صفية….يعنى احنا اللى نختارلها عريس كويس ومناسب ليها

يتجوزها وبكده نضمن ان باباها ميقدرش يجوزها الراجل اللى بيقول عليه ده لانها ساعتها هتبقى فى عصمة راجل
هدى…..طب نجوزها مين دلوقتى مين العريس ده اللى هنجوزه لسچى
صفية….. أكرم هو العريس